Season li chhung final lut thei Chanmari FC AFC-in Chanmari an ngam lo
Chanmari FC-in Mizoram Premier League final hnuhnung pahniha an hneh loh Aizawl FC laka phuba lak nan MPL5 semifinal match hnihah I League club hi vawi hnih an hneh.
Lalsangzuala Hmar hoten first leg-ah K. Malsawmkima kaihhruai 4-1 in an hneh a, nizan khan 2-1 in Chanmari FC an chak leh bawk. Inkhelh pahnih belhkawmah Sanga hote 6-2 in an chak a, December 16 zanah Bethlehem Vengthlang FC nen final an khel ang.
Damdawi in = AFC
Aizawl FC-in inhliam vangin keeper Lalawmpuia, defender pathum Lalram-chullova, Lalrinzuala Khiangte leh Hming-than-mawia bakah winger ṭha Albert Zo-hming--mawia leh Nigerian forward Bright Middle-ton Mends ten inkhel bul an ṭan thei lo vek. Hei chauh hi a ni lo, hrem vangin Ricky Lal-lawmawma a khel thei lo bawk.
Coach K. Malsawmkima'n first leg
aṭangin player panga ngawt a thlak a, captain Rohmingthanga chu midfield aṭangin defence laiah a sawn let bawk. Chanmari FC-ah Thomas Lalengkima a inhliam a, Thakthing Veng tlangval Thomas aiah Ramfangzauva dahluh niin player dang siksawi an awm lo.
Goal khat chauh
Chanmari FC-in an ṭhat theih dan berin an nawr nachungin Rohminga kaihhruaina hnuaia Aizawl FC tlarhnung inrem an su hawng zo lo. Veteran midfielder Rohminga hi tlarhnungah pawh a hmuhnawm tho a, chutihrualin Chanmari tlarhma mahni ṭheuha tih an tum lutuk chu AFC-in goal an chhuah lawk lohna chhanah a ngaih theih.
Aizawl FC tlarhma pawhin goal chance an nei tho a, H. Lalbiakthanga'n a hun ṭha neih a hlah. Minute 41-naah Dodoz-a'n a thiam vangin AFC defender a bum a, Ivorian forward cross ball-in Jonathan-a kut a per avangin penalty a hlawh chhuak. Chanmari tan Sawmfela pen chhuakin tun season-a goal 11-na a khung a, Chanmari West captain Laldampuia nen an goal khung zat a inang chiah.
Dodoz-a goal mawi
Aizawl FC-in second half ṭan aṭanga minute nganaah defender Jonathan-a tauh luh hmangin an siphurh an sut a, Chanmari FC penalty hruai thleng turin goal dang an mamawh. Amaherawhchu minute 57-naah Ivorian forward Dodoz-a'n defender Lalrinchhana ball vawrh um lutin AFC keeper T. Mawia tana dan ngaihna awm loin a pet goal.
Ivorian forward Dodoz hian Chanmari tan match ruk a khelhnaah a goal hmasa ber khung chauh mah se khelmual chhungah a thiam tih a lantir ṭhin avangin MPL5 bika foreigner hmuhnawm bera chhal theih a ni. Semifinal second leg-ah apwh Dodoz-a a hmuhnawm fal a, hun tawp dawn hnaia keeper T. Mawia chiah a hmachawn hnua a khung lo erawh a ui khawp ang.
Chanmari an ropui
MPL2 aṭangin final a awm ṭan a, Chanmari FC an champion nghal. Hemi hnu hian MPL season tinin final khelh ziah a ni a, Chanmari FC an la lut vek.
MPL final awm hnuah league hmahruaitu an la champion vek a, record thlirin Bethle-hem Vengthlang dinhmun a duhawm. Chutih-rualin season li chhung final lut tawh Chan-mari FC hi champion tura rinkai an ni ang.
Tute nge inlan?
Aizawl FC (4-4-2) : Zothanmawia; Lalhriatrenga, Jonathan Lalhriatkima, Rohmingthanga, Lalramhmunmawia; Rochharzela, Lalawmpuia Hnamte (Albert Zohmingmawia 61'), H. Lalbiakthanga, Brandon VL Remdika; William Lalnunfela, F. Lalremsanga (Vanlalduatsanga 50')
Chanmari FC (4-4-2) : F. Lalmuanawma; C. Lalrosanga (Lalrammawia 57'), Ugochukwu Godswill, Lalrinchhana Tochhawng, Ramfangzauva; Vanlalbiaa Chhangte (Lalmuanzova 86'), R. Malsawmtluanga, Lalrinchhana, Leonce Dodoz; Malsawmfela, Lalruatfela Zote (Rochhingpuia 69')
ZoFooty Statistics
Aizawl FC 1 - 2 Chanmari FC
AFC : Jonathan Lalhriatkima 50'
CFC : Malsawmfela 41'(P); Leonce Dodoz 57'
MoM : Leonce Dodoz, CFC
59% Ball Possession 41%
11 Shots 11
6 On Target 5 1 Yellow Cards 2
0 Red Cards 0
Powered By Rainbow Multibrand
Mobile Showroom