Deschamps-a'n contract pawtsei

Didier Deschamps chuan kum 2022 thleng France football team enkawl chhunzawm turin contract a ziak a, Qatar World Cup-ah an ram hi champion lai ni chungin a kaihruai thei dawn tihna a ni.

Kum 51 mi Deschamps hian 2012 aṭang khan an ram team hi a enkawl ṭan. An rama khelh Euro 2016-ah khan final lut mah se Portugal lakah an vanduai; 2018 World Cup-ah erawh ropui takin an champion.Nakkuma European Championship khelh tur atan France hi an in pet tling leh tawh a, coach hian a contract hi a hmang zo a nih chuan kum riat leh thla ruk chhung France enkawl tawhtu Michel Hidalgo khumin Les Bleus enkawl rei ber a ni ang.

French football president Noel Le Graet chuan, "Thutlukna dik tak a ni," tiin an ram coach chu hun rei zawk atana contract an ziahpui chungchang a sawi a, a lakah rinna an nghat ngam hle.

Player a nih laiin Deschamps hian 1998 World Cup-ah khan an ram a champion pui, hemi ṭum hian captain a ni. Tuna a contract neih lai hi Euro 2020 tawp ruala zo tur a ni, tunah erawh kum hnih atan an pawh sei belh.