Zaninah D League leh hmeichhe final

Mizoram Basketball Association (MBBA) buatsaih D League leh hmeichhe inelna final chu zanin hian Hawla Indoor Stadium-ah khelh a ni dawn. Hmeichhe final hi dar 6:00-ah khelh a ni dawn a, LB Associates leh Hotshots te an inhmachhawn dawn.

Mipa final hi dar 8:00-ah khelh tur a ni a, Vanguard leh Chaltlang te an inhmachhawn ang. Finalist pahnih hian season tharah Mizoram Super League an khel dawn a, MSL khel turin tling tawh mah se nomawi duha tuihal ve ve an ni.

Semifinal hi February 3, Thawhlehni khan khelh a ni a, Vanguard hian final lut turin OPD Venghlui 81-67 in an hneh. Semifinal hnuhnung zawkah Chaltlangin Chawnpui 83-56 in an hneh a, final-a inhmachhawn turte hian point 80 an nei tling ve ve.

D League-ah hian team pariat an awm a, vawi khat ṭheuh an inkhelh chhuah hnuah a sang pali Chaltlang BC, Vanguard BC, OPD Venghlui leh Chawnpui BC ten knockout stage an lut. EBBC, Nursery SC, Champhai Boars leh Champhai Vengthlang te erawh a hnuai lamah an awm a, Champhai club pahnihte hi an relegate dawn.

D League rual hian hmeichhe inelna kalpui a ni bawk a, team pathum LB Associates, Hotshots leh Team Alpha te an tel a, vawi khat ṭheuh an inkhelh kual hnuah LB Associates leh Hotshots ten final an lut a ni.