Vawiinah Santosh Trophy semifinal

Football hmanga India rama state leh state inelna sang ber 79th National Football Championship for Santosh Trophy 2025-26 semifinal chu vawiin hian Assam-ah khelh a ni dawn. Chawhma dar 11:00-ah Services leh Railways te an inkhel ang a, chawhnu dar 1:30-ah Punjab leh Kerala te an inkhel ang. NorthEast aṭanga group stage paltlang Nagaland leh Meghalaya ten knockout stage an thleng pha lo.

Santosh Trophy final round-ah Mizoram an tel pha lo a, group stage-ah Nagaland leh Manipur hneh loin an tling zo lo. Nagaland-in hmarchhak aṭanga champion tawh Mizoram leh Manipur te hneh mah se final round-ah chak an nei lo a, table mawngphahah an awm. Group A-ah Nagaland hi West Bengal, Tamil Nadu, Rajasthan, Assam leh Uttarakhand te nen an awm ho.

Champion lai West Bengal hi group A-ah pakhatna ni mah se quarterfinal-ah Services hmachhawnin goal an khung thei lo a, penalty shootout-ah an vanduai ta zawk. Tun hnaia result nei ṭha tawk lo Railways erawh champion beiseina chhi nung turin Rajasthan 2-0 in an hneh a, semifinal-ah Services an hmachhawn ang.

Punjab-in semifinal thleng turin Tamil Nadu an hneh a, an hmachhawn tur Kerala-in inelna thlengtu Assam 3-0 in an sawp. Kerala hi kum 2022-a a champion hnuah an la champion leh lo a, chutihrualin record erawh an nei ṭha reng. Inelna hnuhnung berah pawh final lutin West Bengal lakah 1-0 in an vanduai.