Barcelona-in Copa del Rey semifinal an lut

Thawhlehni zan Copa Del Rey inkhelah champion lai Barcelona chuan 2-1 in Albacete an hneh a, semifinal khel turin an inpetkai. Barca tan Lamine Yamal leh Ronald Araujo ten goal an khung a, Albacete tan Javi Moreno-a'n hun tawp dawnah goal khung ve mah se scoreline timawitu chauh a ni.

Dan pangngaiin Barca-in ball an chang tam a, inkhel an thunun tluan zak. Minute 39-naah Lamine Yamal-a'n mawi takin hmahruaina goal a khung a, goal a luh theih nan Marcus Rashford a thawhhlawk hle. Rashford a hmuhnawm chhunzawm a, second half-ah a corner pet chu Ronald Araujo-a'n a tauh lut a, Barca hmahruaina a belhchhah.

Catalan club tan Rashford, Robert Lewandowski, Ferran Torres leh Dani Olmo te hmangin chance an neih chhunzawm a, an vanneih zan ni se goal tam zawk khung thei tur an ni. Hansi Flick-a nauten last 16-a Real Madrid hnehtu team an ngam hle.

Hun tawp dawn hnaihah Albacete tan Javi Moreno-a'n an si phurh a sut ṭhen a, inlehthal nan a tlai tawh avangin hun a tawp zui a, Barcelona in hnehna changin semifinal an lut.

Barca tan Raphinha a inlan lo a, Brazilian forward Raphinha hian Elche nen an inkhel ṭumin a mal dinglamah hliam a tuar a, Inrinni zana Mallorca an mikhual hunah a inlan theih dawn leh dawn loh a chiang lo.