Milan-in Inter an um zel

AC Milan chuan Serie A hmahruaitu Inter Milan an umzui zel a, Thawhlehni zan khan an mikhualna ramah Bologna 3-0 in an hneh. Milan tan Ruben Loftus-Cheek, Chirstopher Nkunku leh Adrien Rabiot ten goal an khung a, Bologna-in a chhanletna an nei thei lo.

Renato Dall'Ara, Bologna-a inkhelah mikhual team in chance an nei nghal mawlh mawlh a, Loftus-Cheek-a'n keeper chauh a hmachhawn hnuah a pet goal thei lo a, Youssouf Fofana-a'n hnai tak aṭangin a tauh lut thei lo bawk.

Milan an vanduai reng lo a, minute 20-naah buai nuai nuai karah Loftus-Cheek-a'n hnai tak aṭangin a pet goal a, Milan an phur lehzual. Minute 39-naah Nkunku-a'n ama penalty hlawhchhuah chu khungin an hmahruaina a belhchhah a, tun season Serie A-ah goal li a khungna chiah a ni.

Second half ṭan aṭanga minute thumna lekah Adrien Rabiot-a'n goal a khung ve leh - Rabiot hian Bologna defender te tihsual nangchingin keeper chauh a hmachhawn hnuah cool takin a pet goal.Hun tawp thlengin mualneitu Bologna-in goal an khung theih loh avangin 3-0 in Milan an chak.

Milan hian point 50 hmuin pahnihna an nih chhunzawm zel a, an hmelma Inter Milan chu poing ngain an pha lo. Massimiliano Allegri naute hi Coppa Italia-ah an tla tawh a, tun kar tawpah match an nei dawn loh bawk avangin February 13 zanah match an nei leh chauh dawn a, Pisa nen an inhmachhawn ang.