French Cup: Marseille chakna Greenwood leh Aubameyang

Thawhlehni zan French Cup round of 16-ah Olympique Marseille chuan 3-0 in Rennes an hneh a, Amine Gouiri, Mason Greenwood leh Pierre-Emerick Aubameyang ten goal khungin quarterfinal an lut.

Stade Vélodrome, Marseille-a inkhelah Marseille-in goal an khung hma a, minute hnihna lekah Amine Gouiri-a'n six yard box aṭangin hmahruaina goal a khung a, Rennes an hawihai.

Rennes bet bik lo mah se an inthlahdah a, minute 46-naah keeper Brice Samba petchhuah chhe tak chu Gouiri-a'n changin vengtu nei lo Greenwood a pe a, English forward Greenwood-a'n an hmahruaina belhchhah nan a khung. Hun tawp dawn hnaihah Arsenal forward hlui Aubameyang-a'n an chak nemnghehna goal a khung a, harsa lutuk loin Marseille an chak.

Marseille tan Green-wood a che ṭha zel a, Greenwood hian tun season inelna hrang hrangah goal 22 a khung tawh a, a club hlui Man United-in lak let an tum tih thawm a awm bawk. England coach Thomas Tuchel tan World Cup khel tur squad atan Greenwood hi en kan a har ang.

Thawhlehni zan vek hian Reims chuan 3-0 in Le Mans an hneh a, Theo Leoni-a'n goal hnih khungin Yassine Benhattab goal khatna hmangin quarterfinal an lut ve bawk