Jemimah Rodrigues-i'n Delhi final a thlenpui

Women's Premier League playoff-ah Delhi Capitals chuan Thawhlehni zan khan Gujarat Giants chu wicket sarihin a hnehin final an lut. Zanin dar 7:30 hian final khelh a ni dawn a, Jemimah Rodrigues telna Delhi hian Royal Challengers Bengaluru nen nomawi an inchuh ang.

Kotambi-a playoff khelhah ṭhumvawra vannei Delhi-in vawm hmasak an thlang. Gujarat Giants tan Australian opener Beth Mooney a che ṭha a, thi loin ball 51-ah 62 runs a siam. Khawtual club hian over 20-ah 168 runs an siam a, hmeichhe cricket-ah chuan target ṭha pangngai a ni pha.

Delhi lam bat hun an thleng a, an batter-te an che ṭha rual. Opener pahnih Lizelle Lee (43) leh Shafali Verma (31) ten bul an ṭan ṭha a, Laura Wolvaardt pawhin thi loin 24 runs-ah 32 runs a siam. Captain Jemimah Rodrigues a che ṭha a, ball 23-ah 41 runs a siam a, Delhi-in over 15.4 lekah 169/3 runs siamin hnehna an chang.

WPL hi kum 2023 aṭanga khelh ṭan kha a ni a, Mumbai Indians chu champion hmasa ber an nih bakah champion lai ni mah se tun ṭumah knockout stage an thleng pha lo. Kumin inelnaah hian team panga Royal Challengers Bengaluru, Gujarat Titans, Delhi Capitals, Mumbai Indians leh UP Warriorz te an tel a, vawi hnih ṭheuh an inkhelh chhuah hnuah a sang ber RCB-in final an lut nghal. Playoff-a inhmachhawn Gujarat Giants leh Delhi Capitals te hi table-ah pahnihna leh pathumnaah an awm.

League round-a pakhatna RCB hi kum 2024 khan an champion tawh a, kuminah champion nawn an tum dawn. 2024 final rematch hi Vadodara, Gujarat-ah khelh a ni dawn a, BCCI-in an hnuaia association tin President leh Secretary te a sawm angin Cricket Association of Mizoram aṭangin president Robert Lalfamkima leh hony. secretary Lalfakawma Varte ten a hmunah an en ang.