Leverkusen-in German Cup semifinal an lut

Bayern Leverkusen chuan Thawhlehni zan khan Martin Terrier, Patrik Schick leh Jonas Hofmann te goal hmangin St.Pauli 3-0 in an hneh a, DFB-Pokal semifinal an lut hmasa ber an ni.

BayArena, Leverkusen-a inkhelah rin loh takin mikhual team-in bul an ṭan ṭha a, St.Pauli-in goal an khung nghal teuh a, Leverkusen defender ten an pet chhuak thei hlauh. St. Pauli-in hmahruai theihna chance an nei a, mahse Bundesliga-a 17-na team hi an vanneih zan a ni lo.

Chance an neih hnuah St. Pauli an bet a, mualneitu Leverkusen-in an vaw let. Martin Terrier-a'n mawi takin minute 32-naah an hmahruaina goal a khung a, French forward Terrier hian goal kilah tak pet lutin St. Pauli keeper Ben Voll-a'n a ban pha lo.

Minute 63-naah Patrik Schick-a'n hnai tak aṭangin a pet goal a, an hmahruaina a belhchhah. Injury time-ah Jonas Hofmann-a'n chiang takin a pet goal ve leh a, harsa lutuk loin Leverkusen an chak. St. Pauli-in vawi tam goal khung theihna chance an nei a, goal-ah an vanduai avangin a tlawm zawkah an ṭang.

Leverkusen hian tun season tirah league title chawipuitu Xabi Alonso thlak nan Erik Ten Hag an la a, mahse Manchester United manager hlui Ten Hag-a'n rei a daih lo a, a thlak nan Kasper Hjulmand an la lut. Danish coach hi Xabi Alonso ang em em ni lo mah se an result a chhe hran lo. Leverkusen hian Inrinni zanah Borussia Monchengladbach an tlawh dawn a, German Cup lama an result hi Bundesliga-ah pawh chhawm an duh ang.