Kumin hi a tehfung a ni lo - Dhoni

Mahendra Singh Dhoni-a'n World Cup 2027-a Virat Kohli leh Rohit Sharma te tel leh tel loh chungchang zawhna chhangin player thlanna tehfungah kum a tel loh thu a sawi. World Cup hi nakkum October - November 2027 thla hian South Africa, Zimbabwe leh Namibia-ah khelh a ni dawn a, Kohli leh Rohit te chungchang vang sawi a hlawh ṭan der tawh.

India captain hlui Dhoni chuan, "Engvangin nge an tel loh. Ka tehnaah chuan kum hi tehfung a ni lo. An chet dan leh an fitness kha a pawimawh zawk. Chutihrualin mi zawng zawng inang khat veka en a pawimawh. An chet ṭhat a, ram tana khelh an duh te phawt chuan an hlu dawn. Sachin Tendulkar nih ngawt loh chuan inang khat veka en tur a ni a, an chet ṭhat chuan an tel ang a, an che ṭhat loh chuan an tel lo ang," tiin a sawi.

India batter ṭha pahnih Rohit leh Kohli te hi T20 leh Test-ah chuan ram tana khelh an chawlhsan tawh a, ODI erawh an la khel zel. Kohli hi kum 37 mi a ni tawh a, Rohit hi kum 38 a ni tawh thung.