LeBron James hoin Lakers an chak

NBA regular season khelh mekah nimin zing khan Los Angeles Lakers chuan 125-109 in Brooklyn Nets an hneh a, Lebron James leh Luka Doncic an langsar lehpek a, Nets player-ten an ngam lo.

Barclays Center, New York-a inkhelah Lakers tan LeBron James-a'n point 25 leh assist pasarih a nei a, a ni aia score hnem an awm lo. Kum 41 mi James hi a kum tam ve deuh tawh mah se court chhungah team khaipa ber a la ni a, player naupang ho aiin a langsar zawk.

James bakah hian Doncic-a'n point 24 leh assist panga a nei a, James nen Lakers innghahna ber an ni. Anni bakah hian Jake LaRavia (18) leh Austin Reaves (15) ten Lakers chak nan an thawhhlawk hle. Nets tan Michael Porter Jr (21), Day'Ron Sharpe (19) leh Ziaire Williams (17) te khel ṭha viau mah se Nets chakpui nan a tawk zo lo a, a vanduai zawkah an ṭang.

Inhliam vanga a chawlh hnuah Austin Reaves a lo kir leh tawh a, a rawn khel ṭha nghal hle a, Lakers tan thu lawmawm a ni. American point guard Reaves hi nikum December-a Houston Rockets nen an inkhelh ṭumin a chawnah hliama tuar a, Krismas hnuah inlan leh tawh loin thla khat dawn a chawl hman. Reaves bakah hian LeBron james-a fapa Bronny James a inkhel ve leh bawk a, Bronny hian minnute nga khelin point li a score ve hman.