Celtic-in Chamberlain an duh

Scottish club Celtic chuan club nei loa awm mek Alex Oxlade-Chamberlain lak an duh a, Liverpool leh Arsenal midfielder hlui leh Celtic inbiakna a kal mek niin khawthlang chanchinbuten an tarlang.

Kum 32 mi Oxlade-Chamberlain hian hlawhtling taka Liverpool tan a khelh hnuin 2023 khan Besiktas a zawm a, nikum August khan club nen inhriatthiam tawnnain a contract a titawp. Turkish club tan match 50 inlan hmanin goal nga a khungsak hman. Besiktas a chhuahsan hnuah club a la nei leh lo a, a club hlui Arsenal-ah training a nei mek.

Celtic coach Martin O'Neill chuan,"Chamberlain nen kan inbe tawh a, kan inbiaknaah pawh a phur hle. Mahse duhthlan tur tam tak a nei a, club dang pawhin an biak avangin London lamah pawh a insawn thei tho,"tiin Oxlade-Chamberlain an biak thu a sawi.