Jacquet lakluh vanga lawm Slot

Liverpool manager Arne Slot chuan nipui transfer-a lakluh tura Jeremy Jacquet an inrempui thei chu an tan thil lawmawm tak a nih thu a sawi a, club lian tak takin rim mah se, Liverpool a thlan thu a sawi.

Ligue 1 club Rennes centre back Jacquet hian thlasik transfer-ah Reds hi inremna a neihpui a, mahse, nipuiah chauh Liverpool hi a zawm dawn.

Premier League champion hian kum 20 mi defender manah £55mtd an seng a, a khelh ṭhat dan a zira £5mtd pek belh tur a ni dawn - kum nga atan contract a ziak a, kum khat dang pawhsei theih a ni.

Jacquet-a contract hi July 1, 2026 aṭanga chhiar ṭan tur a ni. Slot chuan, "Jacquet kan chang thei hi kan lawm hle. Player theihna nei sang tak a ni a, amah lakluh tum hi keimahni chauh kan ni lo. Chuvang chuan Jacquet kan chan theih nana rim taka hnathawktuten fak an phu hle," a ti.

Chelsea chuan Jacquet hi lakluh tumin an dawr ve bawk a, Liverpool-in an ngamna zatin ngam mah se, Anfield pan a thlang ta zawk a ni. Slot chuan kum naupang tak defender an lakluh chu Liverpool hmachhawp atana pawimawh tak a nih thu a sawi tel.

Dutch coach chuan, "Jacquet kan lakluh hian club tana kan hmathlir leh ruahmannate a hrilhfiah tel nghal. Player naupang tak, talent nei ṭha tak a ni a, tunah leh nakin zel atan pawha kan chhawr ṭangkai theih tur a ni," a ti.

Liverpool hian tun dinhmunah Virgil van Dijk leh Ibrahima Konate chu centre back, inhliam lo an neih an ni a, Konate zawk hi nipui rualin a contract a zo tawh dawn bawk.

Hetihlai hian Reds hian hliam vangin Joe Gomez leh Giovanni Leoni te an chhawr thei lo mek bawk a, nipui laia an lakluh hman ṭep, Crystal Palace captain Marc Guehi chuan thlasik transfer-ah Manchester City a zawm san bawk - centre back an mamawh ang takin Jacquet an la a, nipuiah an la lei belh cheu a nih pawhin a mak lo ang.