Atletico-in Romero an ngaihven

Tun season-a beisei phak lo, Spanish club lian Atletico Madrid chuan nipui transfer-a inthuam chak dan tur an ngaihtuah leh der tawh a, Tottenham Hotspur captain Cristian Romero chu an ngaihven.

Atletico hian season ṭan dawn pawh khan Romero hi an lo ngaihven tawh a, mahse, sum an neih tawk loh avangin an inhnukdawk. Argentine defender hian Spurs tan rinawmna thu a tiam zui a, kum li dang khelh chhunzawm tura contract thar ziakin, kar khatah £200,000 vel a hlawh mek.

Mahse, season ṭan dawna manager thar Thomas Frank-a'n captain atana a ruat defender hi Spurs-ah a hlim lo a, transfer bazar-a club chet danah a lungawi loh thu ual au takin tun hnai khan an sawi.

Romero hian January thla tir khan club thuneitute chu na taka demin, an inbiaknaah dawt engemaw zat an hrilh thu thlengin a sawi! A hnuah manager Frank leh co-sporting director Johan Lange ten Romero hi inbiakna an neihpui.

Spurs hian an club captain hi an hrem lo a, mahse, coach Frank chuan, "Tihsual tawh bawk tihsual leh ṭhin chu a fuh lo," a ti a, mahse, Thawhṭanni khan Romero hian transfer bazar-ah club chu che tawk loa ngaiin na takin a khak leh tawh!

Club board lama thuneitu bakah manager Thomas Frank tan ngei pawh inzah lohna rawng kai thei a ni a, Atletico hian an ngaihven leh tak tak a nih chuan Spurs hian an chhuah hreh kher lo mai thei.