Copa del Rey: Athletic Bilbao leh Real Sociedad an chak

Copa del Rey semifinal inkhelah Athletic Bilbao leh Real Sociedad in an khingpuite an hneh ve ve a, Barcelona hnungzuiin semifinal khel turin an inpetkai. Bilbao-in 2-1 in Valencia an hneh a, Sociedad-in 3-2 in Alaves an hneh ve bawk.

Bilbao tan Inaki Williams

Athletic Bilbao leh Valencia inkhelah Valencia an vanduai a, minute 26-naah Valencia forward Umar Sadiq-a'n an lamah a tauh lut palh a, Bilbao-in hma an hruai. Nigerian forward Sadiq hian a tihsual siam ṭha a, minute sawm hnu lawkah an si phurh sutna goal a khung.

Team pahnihte an inhnehtawk dawna a lan laiin hun pek belhah Inaki Williams-a'n a unaupa Nico Williams-a ball cross chu chakna goal ni turin a khung a, Valencia tan sutna hman a awm tawh loh avangin a tlawm zawkah an ṭang.

Sociedad an chak

Inkhel dangah Alaves-in bul an ṭan ṭha a, Abde Rebbach leh Toni Martinez-a penalty hmangin vawi hnih hma an hruai a, mahse Sociedad tan Mikel Oyarzabal leh Goncalo Guedes ten an si phurh an sut ve ve.

Guedes-a goal khung hnu lawkah Orri Oskarsson-a'n chakna goal a khung a, Icelandic forward Oskarsson-a goal khung hi minute 80-na a ni tawh a, Alaves-in a chhanletna an neih tawh loh avangin Sociedad an chak a, semifinal an lut.

Copa del Rey-ah hian Barcelona chu champion lai an ni a, Catalan club hian Albacete hnehin semifinal an lut tawh. Real Madrid erawhin last 16-ah Albacete hneh loin an tla. Nizan khan quarterfinal match hnuhnung berah Real Betis leh Atletico Madrid te an inkhel a, result kan hre hman lo.