Coppa Italia semifinal-ah Inter inpetkai

Inter Milan chuan Nilaini zan khan 2-1 in Torino an hneh a, Coppa Italia semifinal an lut a, treble champion ni thei turin kawng dik an zawh mek. Inter tan Ange-Yoan Bonny leh Andy Diouf ten goal an khung a, Torino forward Sandro Kulenovic-a goal khung chu scoreline chei mawitu chauh a ni.

Inkhel ṭan aṭangin Inter an hlauhawm zawk a, chance an hlah nual hnuah Ange-Yoan Bonny-a'n Issiaka Kamate cross chu hmahruaina goal atan khung a, French midfielder Kamate hian Inter tan a match hmasa berah assist a nei nghal.

Second half ṭan aṭanga minute hnihna lehakah Marcus Thuram-a ball cross chu vengtu nei lo Andy Diouf-an hnai tak aṭangin a khung a, Inter hmahruaina a belhchhah. Inter-in an player pawimawhte an hahdamtir avangin inkhel a dul chhunzawm hle a, goal an khung tawh lo bawk.

Goal an chhuah hnuah Torino an insiamṭha a, minute 57-naah Croatian forward Sandro Kulenovic-a'n an si phurh a sut ṭhen nan a tauh lut. Torino an harhchhuah tlai bakah goal-ah an vanduai avangin a tlawm zawkah an ṭang a, Inter Milan-in semifinal an lut.

Coppa Italia khelh mekah Inter bakah hian club lian dang Napoli, Atalanta leh Juventus te an la dam a, champion lai Bologna an la dam bawk. Nizan khan Atalanta leh Juventus te an inkhel a, he thu buatsaih lai hian an result kan hre hman lo.