U19 World Cup final : India hmachhawn tur England

Vawiin chawhnu dar 1:00 hian Under 19 Men's Cricket World Cup final-ah India leh England an inhmachhawn dawn. Inelna hi January 15, 2026 khan khelh ṭan a ni a, team 16 telin Zimbabwe leh Namibia ten inelna hi an thleng.

India hian final lut turin semifinal-ah Afghanistan chu wicket sarihin an hneh. Harare-a inkhelah Afghanistan-in bat hmasak an thlang a, Faisal Khan (110) leh Uzairullah Niazai (101*) ten century siam ve vein 310/4 runs an siam.

Target ṭha pangngai taka ngaih ni mah se champion rinkai India tan buaina a tling pha lo. Opener Aaron George-a'n century (115) a siam bakah batter dang Vaibhav Sooyavanshi (68), captain Ayush Mhatre (62) leh Vihaan Manoj Malhotra (38*) te an che ṭha a, over 41.1 lekah 311/3 runs siamin target an umpha.

Final-a India hmachhawn tur England hian semifinal-ah Australia an hneh. Super 6-ah India leh England hi group khatah an awm mah se an inhmachhawn lo a, Harare Sports Club-ah tun inelnaa a vawi khat nan an inhmachhawn ang.