Lyon tan Endrick a vul

French Cup last 16-ah Lyon chuan Stade Laval 2-0 in an hneh a, quarterfinal an lut. Ligue 1 club Lyon tan Real Madrid aṭanga an hawh Endrick-a'n goal a khung bakah Stade Laval keeper Maxime Hautbois-a'n an lamah a tilut bawk.

Nilaini zan inkhelah Lyon-in ball an chang tam zawk a, goal an khung thei lawk lo. Stade Laval-in chance an nei ve reng bawk a, Ligue 2 club hian 21% chiah ball chang mah se an hlauhawm thei hle a, an vanneih zan ni se goal khung hnem thei tur an ni. Lyon keeper Rémy Descamps a khelh ṭhat ve bawk avangin an paltlang thei lo.

Endrick a hmuhnawm a, vawi tam Stade Laval tlarhnung a rum ṭhaih a, goal khung tur erawhin a nghah rei a ngai - minute 80-naah box aṭangin kawh zetin an hmahruaina goal a khung a, Stade Laval keeper Hautbois tan dan ngaihna awm lo.

Injury time-ah Lyon winger Afonso Moreira a shot chu Stade Laval keeper Hautbois-a'n dang mah se a dan perna lamah an lamah a tilut palh a, hun a tawp zui avangin Stade Laval tan an si phurh sutna hun a awm tawh lo a, Lyon-in hnehna an chang.

Lyon tan Endrick-a'n a theihna a lantir zel a, Real Madrid-ah khelhna hmun chang lo mah se kum 19 mi Endrick hian Lyon tan match nga inlan tawhin goal nga a khung tawh. Brazil coach Carlo Ancelotti tan World Cup squad atan en kan a har ang.

Endrick hi June 30, 2026 thleng Lyon-ah a cham dawn a, Lyon-in an hawh manah euro maktaduai khat an pe dawn. Mahse match nga bul a ṭan tlin apiangin euro 200,000-in a loan fee hi a hniam zel dawn a, a awmzia chu Endrick-a'n match 25 bul a ṭan tling a nih chuan Lyon-in an hawh man an chawi lo thei dawn a, a thlawnin an hawh thei ang. He inremna an siam chhan pakhat chu Real-in Endrick hi khel tam se an duh vang a ni.