Arsenal ze ngai a chhuak

Theo Walcott goal hmanga Arsenal hma hruaina chu Manchester City lamin Leroy Sane leh Raheem Sterling te hmangin an chhang let. Pathianni zan Premier League inkhel pawimawhah Pep Guardiola nauten an mikhual Gunners 2-1 in an hneh.

Everton hneh lo hlim Ar-senal-in ṭan aṭanga minute ngana lekah goal hmahruai an khung. Alexis Sanchez-a pass dawngtu Walcott chuan minute ngana lekah cool zetin a pet goal. City-in second half minute hnihna lekah Sane hmangin an siphurh an sut a, minute 71-naah British player manto ber Sterling chuan chakna goal a khung.

Gunners-in Champions League last 16-a Bayer Munich an hmachhawn dawn tih an hriat hnuah Premier League-ah a zawnin vawi hnih an chak lo - table-ah palinaah an tla thla. Pep Guardiola kaih-hruai Manchester City erawh pahnihnaah an invawrh chho a, nizan lama Merseyside Derby result a zirin an dinhmun a la danglam thei bawk.

City tak tak

Manchester City hian mid-fielder Fernandinho leh goal thun khawl Sergio Aguero ten hrem an tuar mek a, Germany midfielder Ilkay Gundogan chu hliam vangin an chhawr thei lo bawk.

City tan Kevin de Bruyne chu goal an nawr nana thapui thawhtu a ni. Belgium international hian si an phurh hnu lawkah Sterling tan ball duhthusam a vawrh luh sak a, England international hian goal zawnah a tauh lo thung.

Second half-ah pawh kum 25-a upa Bruyne chu khelmual chhunga roreltu a ni a, a goal khung tur ṭha takin Petr Cech-a'n a lo dan sak. Minute 71-naah Bruyne hian halfway line bul aṭangin Sterling tan long ball a pet thut. Liverpool midfielder hlui hian a hun ṭha neih a hlah nawn lo - City goal hnihna hi Arsenal defending chhiat vanga ngaih theih a ni bawk.

Pep-a hote hian champion lai Leicester City 4-2 a an hneh loh hnuah Watford (2-0) leh an elpui Gunners an hneh a, hmahruaitu Chelsea nuam saa awmtir an tum lo.

Arsenal ze ngai

Season ṭan niah Arsenal hi an mikhual Liverpool lakah 4-3 in an tlawm a, hemi hnuah a zawnin league match 14 chhung chu chak loh nei loin an kaltluang. Arsene Wenger-a naute hi Everton khelmual Goodison Park-ah 2-1 in an tlawm a, tunah City lakah an goal neih sa venghim zo loin an chak lo leh ta. Chelsea keeper hlui Cech hian a career-a a vawi khat nan a zawnin Premier League match kua chu clean sheet a nei ta lo.

Arsenal hian striker palian Olivier Giroud an nei. France ineternational hi Euro 2016 a khelh avangin team training a zawm tlai a, hliam a nei zui bawk - a chungah Wenger-a'n rinna a nghat ngam lo a, league match-ah inkhel bul a
ṭantir ngai lo. Deportivo La Coruna aṭanga lakluh Lucas Perez lah chu bench a ṭhu tawk chauh a ni bawk.

Gunners hian tlar hma^-ah Sanchez an nei a, a rin--tlak. Chutih rualin Chile international hi tharum hman hnemna Premier League match zawng zawnga hlawhtling taka khel vek thei chi a ni bik lo a, a thachhang dawltu tur an nei ṭha tawk lo. Gunners hian club lian dang an elpuite nena khaikhin ralah chuan inkhel boruak thlak danglam turin bench-ah player an nei chhah tawk lo bawk.

Eng nge an sawi?

Arsenal manager Arsene Wenger chuan, "Kan goal chhuah pahnih kha offside vang a ni, hetianga chak loh hi chu pawm thiam a harsa hle. Thutlukna dik lo kan tuar zeuh zeuh a, a pawimawh ber erawh keimahni kan insiamṭhat a ngai," tiin an goal chhuah pahnih a pawm thiam lo.

Gunners hian December 26-ah West Brom an lo mikhual ang a, kum thar lawm nan January 1-ah Crystal Palace nen Emirates Stadium-ah an in hmachawn leh bawk ang.

Manchester City manager Guardiola chuan, "Hnehna kan changa kan hlim. Tunah chuan kan inkhelh hmabak kan ngaihtuah leh tawh ang. Hmahruaitu Chelsea nen kan inthlauhna point sarih a ni a, season chawhnu lamah chuan a chung bera awm turin theih tawp kan chhuah ang," tiin champion a la tumruh hle.