Sawi bo theih loh Spurs

Tottenham Hotspurs-in Pa-thianni zan khan Burnley an lehthal a, White Harte Lane-ah 2-1 a chakin table-ah pangana an ni.

Mauricio Pochettino hote hian point 33 an hmu tawh a, an hmelma Arsenal nen point khat chauhin an pha tawh lo. Tottenham hian Manchester United an hneh loh hnuah Hull City leh Burnley an hneh tawh a, Gunners hi champion thei tur zinga sawi bo theih an nih loh chuan nomawi chawi thei zingah Spurs hmaih a thiang lo.

Goal thum

Tottenham an fimkhur tawk lo a, mikhual Burnley lamin minute 21-naah Ashley Barnes hmangin goal an khung hmasa. Amaherawhchu Delle Alli hmangin minute ruk hnuah Spurs-in an sut.

English midfielder Alli hian goal a khung hmain goal ban a pet per a, goal a khung theih nan Kyle Walker-a'n a cross ṭha bawk.

Pochettino-a'n minute 62-naah Mousa Dembele aiah Moussa Sissoko a lut a, minute ruk hnuah French midfielder hian Stephen Ward khupah a tlawh. Spurs midfielder hnawhchhuah ngei tur ni mah se yellow card chauh pek a ni.

Burnley rilru natna belhchhah turin Sissoko hian Danny Rose tan 'killer pass' a pe a, English left back Rose hian minute 71-naah kawh zetin a pet goal - chakna goal a ni zui bawk.

Lawm leh lawm lo

Burnley boss Sean Dyche chuan, "Mawlmang takin a che a ni a, ngaihtuah buai a ngai lo, red card mai tur a ni," tiin Sissoko chu a chet dan avanga hnawhchhuah tur a nih thu a sawi.

Tottenham manager Mauricio Pochettino chuan, "Premier League-ah chak a har em em a, kan player-te an thawkrim a, ball zawng zawng chan tumiin an chuh vek a, Burnley hneh kha kan phu a ni," tiin a sawi.

Spurs hmabak Saints

Southampton-in Nilaini zana Stoke nen an inhnehtawk ṭumin vawi 15 goal khung tumin an pet a, goal zawnah vawi li kal mah se goal an khung lo. Pathianni zanah erawh Saints-in khualmualah Bournemouth 3-1 in an sawp.

Cherries-in minute rukna lekah Nathan Ake hmangin khung mah se Saints-in minute riat hnuah Ryan Bertrand hmangin an sut a, second half-ah Jay Rodriguez-a'n goal hnih a khung belh.

Bournemouth hian boxing day-ah league hmahruaitu Chelsea an hmachhawn ang a, Southampton-in Nilaini zanah Spurs an mikhual ang.