Chanmarians hmachhawn tur Kulikawn

Mahuma Memorial Cricket Tournament khelh mekah Kulikawn chuan final an lut ve leh ta. Champion lai Kulikawn hian an nomawi kawl lai humhim an tumna kawngah nimin khan Chhinga Veng chu run 85-in an sawp a, champion nomawi chawi nawn turin Chanmarians chiah hmachhawn an ngai ta.

Suaka Memorial Cricket Ground, Sihhmui a inkhelah Kulikawn an bat hmasa zawk a, over 40-ah run 191 zet siamin wicket ruk an hloh a, Chhinga Veng tan target an tuk sang hle. Kulikawn hi inkhel
ṭantir lamah talbuai deuh mah se state pawn aṭanga an lakluh Prasenjit Sarkar chuan run 70 zet vaw chhuakin beiseina thar a siam sak a, Gaurav Sharma (37 runs) leh Parvez Ahmed (25 runs) ten an thlawp ṭha hle bawk. Chhinga Veng tan bowler Lalnuntluanga'n over riat a vawmah run 22 chiah pein wicket thum la mah se thlawptu a nei ṭha tawk lo.

Chhinga Vengin target sang tak an nei tih hriain theihtawp chhuah mah se an batsman ten beisei an phak lo a, run 19 siamtu opener Abhay Joshi aia run siam hnem thei an awm lo! 3C (Chhinga Veng sawina) te hian over 29.2-ah run 106 chiah siamin wicket an hloh vek a, final luh phu zawk Kulikawnin a kum zawnin Mahuma Memorial Cricket Tournament-ah final an lut ta a ni. Final hi December 21-ah khelh a ni ang.