Barcelona chak, Real umpha lo

Lionel Messi-a'n kum 2016-a Barcelona goal hnuhnung ber a khung a, Catalan club-in derby match-ah Espanyol 4-1 in an sawp. Luis Enrique hote hian Pathianni zanah hnehna chang mah se an mahni aia match khata khel tlem Real Madrid point thumin an pha lo.

La Pulga Show

Nou Camp-ah Luis Suarez-a'n goal hnih a khung hnuah Jordi Alba-a'n Barcelona goal thumna a khung. Espanyol lamin David Lopez hmangin goal khatin chhang let mah se khelmuala hmuhnawm ber Messi-a'n hun tawp hma hretin goal lina a khung.

A patet avanga La Pulga (The Flea) an tih mai, Messi hian Espanyol defender pali a bum hnuah goal-ah petin keeper Roberto Gago dan per chu Uruguayan forward Suarez-a'n a chet ranna leh striker ṭha bik a nihna lantir nan a hmang.

Barca left back Alba goal khungna turah pawh Messi a inrawlh thuk leh a, Argentina captain hian Espanyol midfielder pahnih karah chak takin ball a lalut a, defender pahnih kar aṭanga tal chhuak lehin La Pulga ball tih per chu Alba-a'n kawh zetin a pet lut. Goal luh zawh chiaha player-te mak ti hmel leh club pahnih coach te chet danin Messi chevel mi naran tih theih a ni lo tih a nemnghet.

Hun tawpah Messi-a'n ama pualin goal a khung. La Pulga hian dinglam kil aṭangin chak taka ball a lakluh hnuah Suarez a pe a, Uruguayan forward hian mawi takin Espanyol defender pet khumin Messi-a'n keeper kap karah a khung.

An sawi zui

Barcelona forward Luis Suarez chuan, "Leo hi chuan playstation (video game) ang chiahin a khel thei a ni. A hlim tih a hmelah a hmuh theih a, kan club-a awm reng tur hian kan duh a, thutlukna erawh ama siam tur a ni," tiin a khelhpui a fak.

Barca captain Andres Iniesta chuan, "Team thawhhona hi a pawimawh a, kan vaiin kan tih tur ṭheuh kan tih chuan mimal tan parchhuah a awlsam sawt
ṭhin. Messi kan tan chuan player pawimawh bik a ni," tiin a sawi.

Catalan club boss Luis Enri^-que chuan, "Messi hnathawh hi mi nazawng tih theih a nih loh avangin kan fak a ṭul a, chutihrualin keini chuan chawlhkar hnih danah Nou Camp-ah kan hmu ziah a ni," tiin Messi chu player danglam bik a nih thu a sawi.

An hmabak sawi chhun-zawmin Enrique chuan, "Kum 2016 match hnuhnung bera kan chak avangin ka lawm a, kum 2017-a La Liga champion tuma inumna a ngaihnawm sawt ang. Tuna kan awmna hi kan duhna a ni bik lo a, amaherawhchu Real Madrid an che ṭha tih kan theihngilh loh a ṭha. Tuna pawimawh ber chu nomawi chawi a ni," tiin kum tawp hmahruaitu nih aiin season tawp hmahruaitu nih a pawimawh thu a sawi.

Real Madrid-in FIFA Club World Cup an khelh avangin kuminah La Liga match an khel tawh dawn lo. Zinedine Zidane hoten Japan ramah harsa takin Club World Cup nomawi an chawi a, Messi chet ṭhat leh takah chuan Spain lamah a aia harsain hmuak tih a chiang leh ta reng bawk.