Napoli chakna Mertens goal li

Pathianni zan Italian Serie A inkhelah Napoli tan Dries Mertens-a'n goal li a khung. Belgium forward hian England goalkeeper Joe Hart ti mualphoin Napoli chu Torino lakah 5-3 in hnehna a chan pui.

Napoli tan hian Mertens bakah Tottenham centre back hlui Vlad Chiriches chuan goal khat a khung ve bawk. Kum 29-a upa Mertens hian an match hnuhnung zawka Cagliari 5-0 a an sawp ṭumin hat trick a lo siam tawh bawk.

Kum 1974 khan Juventus forward Pietro Anastasi chuan match zawnin hattrick a lo siam tawh a, ani tih lohah chuan Mertens hi goal khung harsatna hmun tia an sawi ṭhin Serie A-a match zawna hattrick siam leh thei hmasa ber a ni!

League match 17 khelh tawh a-ṭangin Napoli hian point 34 hmuin table-ah pathumnaah an inhlangkai a, hmahruaitu Juventus an phak lohna chu point ruk a ni.

Inkhel dangah Inter Milan chuan a zawna league match thum chhung hnehna an channa ni turin Sassuolo an hneh. He inkhela goal awmchhun hi first half-a Antonio Candreva khung a ni. Lazio chuan league table-a palina ni turin an mikhual Fiorentina chu 3-1 in an hneh ve bawk.