Costa goal hmangin Bayern chak hram

Bayern Munich chu Bundesliga table hmahruaitu an ni leh ta. Pathianni zan inkhelah champion lai Bayern hian Douglas Costa goal khat hmangin Darmstadt 1-0 in an hneh.

Carlo Ancelotti naute hian match 15 khelh tawh aṭanga point 36 hmuin hmahruaitu an ni leh ta a, point hmuh zat inangah RB Leipzig aiin goal an khung hnem zawk avangin a chung berah an awm. League table chunga awm pahnihte hi Nilaini zanah an inhmachhawn ang.

Allianz Arena-a inkhelah Bayern hian ball possession 79% zet changin inkhel thunun hle mah se goal khat bak an khung thei lo. Goal awmchhun khung tur pawh hian minute 71-na thleng an nghah a ngai hial.

Tun hnai Bundesliga season li chhung chu Bayern Munich leh Borussia Dortmund te inelna a ni deuh ber ṭhin. Kuminah erawh kaithar Leipzig an rawn lang nawlh a, beisei loh takin Bayern chhaih buai theitu ber an ni mek.

Bayern manager Ancelotti chuan, "Darmstadt khan an tlarhnung an rem phui ṭha em em a, kan tan inkhelh a harsa takzet. A tawpah hnehna kan chang hram a, kan vannei hle. A pawimawh ber chu league hmahruaitu kan ni leh te hi a ni a, ka naute khelh danah lungawi lohna tur a awm lo," tiin a sawi.

Italian manager Ancelotti chuan inkhelh hmabak thlir zuiin, "Leipzig hi team ṭha tak an nih zia kan hmu chho mek a, chutih rualin keimahni khelmual khel tur kan nih avangin fans puihna kan nei ṭha leh dawn a zamna tur a awm lo. Darmstadt kan khelh aia game rang zawk kan khelh theih ka beisei a, kan goal nawr pawh a na sawt ang," a ti.