Indian Super League Atletico de Kolkata an champion

Mizo tlangval Lalrindika Ralte leh Robert Lalthlamuana te khelhna Atletico de Kolkata chu Indian Super League champion an ni ta. Kolkata club hian Pathianni zan khan Kerala Blasters chu hun pangngaiah goal khat ve ve khunga an inhnehtawkpui hnuin penalty hmanga chak zawk zawn a ni a, 4-3 in hnehna an chang.

Lunglei tlangval Didika chu Emerging Player of the Match-ah thlan a ni a, semifinal first leg-ah he chawimawina hi lo dawng tawhin Kolkata club an champion-na kawngah a thawhhlawk hle. Khawzawl tlangval Robert-a erawh semifinal second leg-ah red card a hmuh avangin final a khel thei lo thung.

Cho leh cho

Jawaharlal Nehru Sta-dium, Kochi khawpuia fans 54,000 pungkhawm hmaa hun ṭha nei hmasa zawk chu mualneitu Kerala Blasters an ni. Haitian forward Kervens Belfort-a'n Mohammed Rafi tana a siamsak chu ATK defender Tiri-a'n ṭha takin a lo dang hman a, mikhual team an vannei.

Kolkata club zawk an hlauhawm chhunzawm a, Iain Hume leh Helder Postiga te mawi taka ball an inpek kual hnuah Portugal international hlui Postiga-a'n hun ṭha a khawhral a, Didika ball cross
ṭha tak chu Sameehg Doutie-a'n goal-ah a chantir thei lo bawk.

Porto striker hlui Postiga leh Didika ten Blasters tlar-hnung rumṭhaih fo mah se goal khung hmasatu erawh mualneitu an ni. Minute 37-naah Mehtab Hossain chuan Rafi tan ball ṭha tak a vawrh phei a, khawtual tlangval tan lo tauh luh mai chu hna awmchhun a ni.

Hei le Kolkata

Kolkata-in si phurh rei an duh lo. Goal an chhuah aṭanga minute sarih hnuah an khung ve lehnghal a, Doutie corner aṭanga ball kal chu Porto defender hlui Sereno-a'n si phurh sutna goal ni turin a khung. Chawlhlawk hman a nih hnuah team pahnihin hun ṭha an nei tam tawk lo a, Kolkata tan Didika'n hlauhawm taka area chhunga ball a vawrh nang hman an awm lo chu uiawm tak a ni.

Minute 90 chhunga team pahnihin goal dang an khung theih loh avangin extra time khelh a ni a, goal a la luh loh cheu avangin penalty hmanga champion tur zawn a ni. Kerala tan Antonio German-a'n a chhuih luh hnuah ATK innghahna Hume-a'n a khung lo! Blasters inrintawkna belhchhah turin Belfort-a'n a khung a, Doutie-a'n ATK tan a khung ve bawk.

Blasters fan-te thawm ṭhat vanglai takin Elhadji Ndoye-a'n bar chunglamah a thlawh a, Kolkata captain Borja Fernandez-a'n 2-2 ni turin tihsual a nei lo. Mohammed Rafique-a'n Kerala fan-te hnual tur kaihharh nan khung ve leh mah se Kolkata tan Javi Lara-a'n a khung hnuah Blasters captain Cédric Hengbart-a'n a khung theih loh avangin ATK hi 4-3 in an chak a, season thum khelh tawh ISL-ah a vawi hnih nan an champion.

Mimal Lawmman

Emerging Player of the Match Lalrindika Ralte, Atletico de Kolkata

Hero of the Match Henrique Sereno Fonseca, Atletico de Kolkata

Kolkata khawpui lawmna Didika

ISL season ṭan tirah Lal-rindika Ralte-in pre-season tour a zawm ve hman loh avangin inkhel bul a ṭan meuh lo a, mah se a hun neih chhunah a theihna a pholan ṭhin avangin ISL an champion meuh chuan coach José Francisco Molina player rin ber pawla mi a ni tawh.

Vawi 13-a inlana Emer-ging Player of the Match vawi thum ni thei Didika chuan, "Calcutta Football League ka khelh avangin ATK ka zawm lawk thei lo a, ka khel la hmu tam lotu coach hian a tirah min ring lawk ngam lo. Mahse, ka hun ṭha neih chhawr ṭangkaiin ka theihna ka pholang a, kan champion ta hial hi ka lawm takzet a ni," tiin Vanglaini palai a hrilh.

Didika chuan Kolkata champion pui chu thil danglam tak a nih thu sawiin, "Mumbai City tan pawh ka khel tawh a, ATK-a khelh chu a danglam bik a ni. Kolkata khawpui hi football atchilhna khawpui a ni a, he khawpui club tana champion chu nuam tak a ni. Kerala Blasters khelmualah fans an ṭhat ṭhin avangin inkhelh a harsa a, he hmun ngeia kan champion hian lawmna a belhchhah bawk," a ti.

Lunglei tlangval Didika chuan, "Mizo mipuiten min ṭawiawm tlat ṭhin a, hliam vanga ka inkhelh theih loh reng lai pawha ṭawng-
ṭaina nena min puitute an nih avangin ka tan chuan an hlu a, an chungah ka lawm takzet a ni," tiin Vanglaini palai hnenah Mizo mipuite ṭawiawmnaah a lawm thu a sawi.

Didika'n kum 2009-ah Churchill Brothers aṭangin a career a ṭan a, Goan club hi Goa Pro League leh Durand cup-ah a champion pui a, East Bengal tan Federation Cup bakah Calcutta Football League-ah vawi nga a champion a, India tan SAFF Cup nomawi chawi tawhin Indian Super League-ah a champion leh ta. Didika chuan season thara a tum ber tur chu I League-a East Bengal champion pui a nih thu Vanglaini palai a hrilh.

Robert-a a hlim

Khawzawl tlangval Robert Lalthla-muana'n season thum ISL-a khelhnaah champion nomawi a chawi a, TFA Academy chhuak tlangval hian India rama tournament lianthamah chuan nomawi a chawi vek tawh.

Semifinal second leg-a red card a hmuh vanga final khel thei lo defender chuan, "Season thum ISL ka khelh hnuah champion nomawi ka chawi ve ta a, ka hlim takzet a ni. Kan coach Molina hian player zawng zawng min ring vek a, hei hian team-ah inlungrualna ṭha tuhin kan champion phah niah ka ngai," tiin Vanglaini palai a hrilh.

ISL khelh zawh taka ATK tana match kua kheltu Robert hian ISL season hmasa pahnih chu Delhi Dynamos tan a khel a, I League-a a season hmasa bera Churchill Brothers tana nomawi chawitu tan tun hi ISL-a a champion hma-sak ber a ni. Season thar I League-a East Bengal tana khelh chhunzawm tur Robert-a chuan, "ISL final ka luh hmasak ber a nih avangin ka khel thei lo kha ka ui takzet a, mah se kan champion tho a, a nuam takzet. Season tharah I League nomawi chawi ngei tumin theihtawp ka chhuah chhunzawm ang," tiin hmabak eng takin a thlir.

Hero of the League Malouda

Indian Super Lea-gue-a player ṭha ber-a thlanchhuah chu Delhi Dynamos winger Florent Malouda a ni. Chelsea winger hlui hi Delhi club-in semifinal an luhna kawngah player pawimawh pawl niin vawi 16 a inlan a, goal thum khungin assist pathum a nei.

Golden Glove dawng-tu chu Amrinder Singh a ni. Mumbai City keeper hian Bengaluru tana AFC Cup final khelh vangin ISL-ah a hmel lan lawk lo mah se match ruk a inlanah match nga goal a chhuah lo a, Punjabi keeper hian Golden Glove dawn hi a phu hle.

Delhi Dynamos for-ward Marcelinho chu goal khung hnem ber a ni a, match 15 a inlanah goal 10 khungin assist panga a nei a, ISL club tlarhnungte chhaih mangang ṭhintu a ni. Fittest Player of the league-ah Real Madrid midfielder hlui, Atletico de Kolkata tana khel mek Borja Fernández thlan a ni a, Fair Play Award chu Chennaiyin hnenah hlan a ni.