Emerging Player of the League Jerry Lalrinzuala

Season hmasa ISL-ah Jeje Lalpekhlua chu Emerging Player of the League a ni a, tun season-a he dinhmun luahtu pawh Mizo rawlthar Jerry Lalrin-zuala a ni. Chennaiyin left back hian a club chu semifinal hruai thleng thei lo mah se league match 13 a inlanah Emerging player of the match-ah vawi li thlan a ni a, Winning pass of the match leh Swift moment of the match vawi khat ve ve a dawng bawk.

Chennaiyin match hnu-hnung bera freekick goal ropui khungtu Jerry chuan, "Season ṭan tirah khan tun dinhmun hi ka thlen theih ka beisei lo a, heng zawng zawng hi a bul ber chu Pathian a ni. Kan khua Farkawn mipuite bakah kan chenna Bethlehem Veng mipui ten nasa takin min lo ṭawngṭaipui ṭhin a, an chungah ka lawm takzet a ni," tiin Vanglaini palai a hrilh.

ISL-a goal khat khunga assist pahnih neitu defender chuan sawi chhunzawmin, "Kan coach Marco Materazzi-a'n min ringtawkin hun ṭha min siam sak a, a chungah ka lawm hle. Vawiina ka thlen chin hian phurna nasa tak min pe a, season thar I League lo awm turah pawh tun aia hmasawn lehzual turin theihtawp ka chhuah ang," tiin Vanglaini palai hnenah a sawi bawk.