Gunners lakah Chelsea boss lawm lo

Chelsea boss Liam Rosenior chuan Carabao Cup semifinal-a Arsenal nen an intawn ṭuma Gunners ho chet dan a dem thu a sawi chhuak a, Chelsea an zah lo hle niin a sawi.

Nilaini zan khan Chelsea hian League Cup semifinal second leg-ah Arsenal chu 1-0 in an ngam lo a, inkhel hmasa nen belhkhawmin 4-2 in an tlawm a, League Cup an mangṭha.

Inkhelh dawna Arsenal player-te warm up lai chu Chelsea awmna lam thlengin an tlan phei a, hei hi Rosenior chuan duh loin, na takin a lo au khum.

Chelsea boss chuan, "Player lam pawh a ni lo. Warm up kan lak reng rengin, lehlamin khelmual chanve an chang a, chutiang chuan kan insem ṭhin.

"Ka team emaw coach emaw-te hi kan khingpuite awmna lama warm up la turin ka ti ngai lo reng reng. Arsenal chet dan kha a fuh lo ka ti a, kan warm up an tibuai pha a ni," a ti.

English coach chuan sawi zawmin, "Arsenal player-te kha anmahni lama awm mai turin ka hrilh a, ka hrilh danah pawh ka polite zo tawh bik lo tih ka hria.

"Rilru sukthlek in ensak a, chutianga inchhaihbuai tum pawh ka ni lo. Kei chuan kan inzah tawn tur a ni, tih hi ka ngaihdan a ni mai a, football-ah hian tihdanphung mawi tak a awm sa ve a ni," a ti.

Rosenior chuan sawi zawmin, "Arsenal nen hian buaina engmah kan nei lo a, manager Mikel Arteta pawh ka zah em em. Mahse, kha thilah kha chuan ka team kha zah takin an en loah ka ngai a ni," a ti a, a rilru a dam thei lo.

Kum 41 mi Rosenior hian Chelsea a enkawl hnuah match riat kaihruai tawhin, vawi ruk hnehna a chanpui a, a tlawm pahnih hi League Cup semifinal match hniha Arsenal a ngam loh ve ve chu a ni!

Second leg-a Gunners an ngam loh ṭum hian centre back pathum hmangin a naute inkhel bul a ṭantir a, 3-2 a hnufual sa an nih avangin mak tih a hlawh hle. Second half-ah Cole Palmer leh Estevao Willian luhtirin, khelh dan phung a thlak a, mahse, an chak zo ta chuang lo.

Rosenior-a tactic-in sawi zui a hlawh a, mahse, a zam lo. English coach chuan, "Thu lengvak hi mak ka ti hran lo a, min tibuai hran lo bawk.

"Pawn lam mi thusawiin club tana thutlukna ka siam kawngah nghawng a nei miah lo bawk. Kan chak tak loh avangin, 'lo ti ta zawk ila...' tia sawi tur chu tam tak a awm ang. Mahse, team ṭha tak lakah ṭha takin kan khel a ni," a ti.

Chelsea hi Premier League table-ah pangana an ni mek a, point khat chiahin palina Manchester United an ngam lo. Zanin dar 8:30-ah league match khel turin Wolverhampton Wanderers an lenchilh dawn a, table mawngphah lakah chak an beisei ang.