PSG chelh tumtu Marseille

Ligue 1 table hmahruaitu Paris Saint Germain chuan pathumna Olympique Marseille an mikhual dawn a, Pathianni zan dar 1:15-ah an inkhel ang. PSG hi an hnuai chiaha awm RC Lens nen point khat chiaha an inthlauh avangin point hloh a thiang dawn lo a, Marseille-in khualmuala chak turin theihtawp an chhuah thung ang.

Champions League lamah PSG hi khel chhe lo mah se direct-in last 16 an lut pha lo a, Ligue 1 lamah chet sual nawn tum loin Strasbourg an hneh a, Marseille lakah pawh hnehna chan ngei an tum dawn a, inkhel hmuhnawm kan hmuh a rinawm.

Marseille tan Mason Greenwood-a'n en bik a hlawh leh dawn a, Manchester United forward hlui hian league-ah goal 13 a khung tawh a, ani aia khung hnem an awm lo. A chet ṭhat em avangin a club hlui Man United-in lak let an tum tih thuthang a awm bawk.

Greenwood thlawp tur hian striker tawnhriat ngah Pierre-Emerick Aubameyang a awm bawk a, Marseille hian player langsar dang an ngah bawk avangin PSG hneh turin an ṭha tawk.

Luis Enrique naute zingah Fabian Ruiz chu a khup hliam vangin a inlan theih a rinawm lo a, Strasbourg lakah hnawhchhuah a nih avangin Achraf Hakimi a inlan thei dawn lo a, ani bakah hian Newcastle laka inhliam Khvicha Kvaratskhelia dinhmun a chiang lo bawk.

Inhliam neuh neuh awm mah se PSG squad a chhah a, Kvaratskhelia awm lo mah se Senny Mayulu a che ṭha a, Bradley Barcola-a'n goal sarih a thun tawh bawk avangin tlarhma lamah buaina tur a awm lo. Hakimi awm loh hlanin midfielder Warren Zaire-Emery chu right back-ah hman ṭhin a ni a, Marseille lakah pawh Hakimi aiawhin tlarhnungah a awm leh a rinawm a, awlsam takin Marseille lakah tlawm an tum dawn lo.