Lakers tan Reaves a lo kir

NBA Regular season khelh mekah nimin zing khan Los Angeles Lakers-in 119-115 in Philadelphia 76ers an hneh a, Austin Reaves a langsar a, a inhliam hnua point a score san ber ṭum a ni.

Crypto.com Arena-a inkhelah hian Lakers tan Reaves-a'n point 35 a score a, rebound vawi ruk lain assist pahnih a nei bawk a, Lakers chak nan a thawhhlawk hle. Reaves bakah hian veteran player LeBron James chuan point 17 leh assist 10 a nei a, point 14 score tu Jake LaRavia leh Rui Hachimura bakah Luka Doncic (10) te an ṭangkai viau bawk.

76ers tan Tyrese Maxey leh Joel Embiid te an khel ṭha a, Embiid-a'n point 35, assist pasarih leh rebound vawi 7 a la a, Austin Reaves nen an point score zat inang mah se a team chakpui nan a tawk lo.

Inhliam vanga a chawlh hnuah Austin Reaves a lo kir leh tawh a, a rawn khel ṭha thei hle. Lakers tan thu lawmawm a ni. American point guard Reaves hi nikum December-a Houston Rockets nen an inkhelh ṭumin a chawnah hliam a tuar a, Krismas hnuah inlan leh tawh loin thla khat dawn a chawl hman.

Reaves lo kir leh hnuah Lakers an ṭha sawt a, LeBron James leh Luka Doncic te nen an inkawp leh dawn a, champion ngei turin beiseina sang tak an nei ang.