Atletico tan Lookman a vul nghal

Atletico Madrid chuan Ningani zan khan 5-0 in Real Betis an hneh a, Copa del Rey semifinal an inpetkai. Atletico tan an player thar Ademola Lookman a ṭangkai nghal a, goal a khung bakah a ṭhiante khung tur vawi khat a siamsak nghal. David Hancko, Giuliano Simeone, Antoine Griezmann leh Thiago Almada ten goal an khung bawk.

Inkhel ṭan aṭangin Lookman a hlauhawm nghal a, Real Betis tlarhnung vawi tam a rum ṭhaih a, a vanneih zan ni se goal tam zawk khung thei tur a ni. Spain-ah lookman a tlangnel nghal hle. Minute 12-naah Hancko-a'n hmahruaina goal a tauh lut a, Atletico an hawikir tawh lo.

Atletico-in a khat mawi tawkin goal an khung a, minute 30-naah Atletico coach Diego Simeone fapa Giuliano Simeone-an a pet goal ve leh a, minute sarih hnu lawkah Lookman-a'n defender pahnih bumin cool takin a pet goal a, first half-ah 3-0 in hma an hruai der.

Second half-ah pawh Atletico bawkin inkhel an thunun a, minute 62-naah Griezmann-a'n Lookman a siamsak chu a pet lut a, minute 83-naah Thiago Almada-a'n pet goal ve lehin nuamsa takin, 5-0 in Atletico an chak.

Atletico hi Copa del Rey semifinal lut hnuhnung ber an ni a, an hmaah Barcelona, Athletic Bilbao leh Real Sociedad te semifinal-ah an lo inpetkai tawh a ni.