Sassuolo mikhual tur hmahruaitu Inter Milan

Serie A hmahruaitu Inter Milan chu Pathianni zan dar 10:30-ah Sassuolo khelmualah an leng lut dawn a, an hmelma AC Milan-in an um ve reng avangin treble champion thei dinhmuna ding Inter-in chak ngei an duh dawn.

League match hnuhnung 12 an khelhah Inter-in tlawm an nei lo a, an tlawm hnuhnun ber chu November-a AC Milan an hneh loh kha a ni. Champions League lamah pawh an che chhe hran lo a, a sang pariat zingah tel pha lo mah se 10-naah an inhlangkai thei a, Coppa Italia-ah Nilaini zan khan Torino hnehin semifinal an lut tawh bawk a, Cristian Chivu naute hi an phur vanglai tak a ni.

Inter tan Lautaro Martinez chu tlarhma lamah an innghahna a ni leh dawn a, Argentine forward hian tun season Serie A-ah goal 13 a khung tawh a, a ni aia khung hnem an awm lo. Kum 28 mi Martinez hian inelna hrang hrangah goal 21 a khung tawh a, khawvela forward ṭha berte zinga mi a ni.

Martinez kawppui turin Marcus Thuram leh tun hnaia che ṭha tak Ange-Yoan Bonny an awm thei dawn a, anni bakah tun hnaia rawlthar hmuhnawm zinga mi Pio Esposito a awm dawn bawk avangin tlarhma lamah Inter an ngaihtuahawm loh.

Midfield-ah hliam vanga chawl Hakan Calhanoglu leh Nicolo Barella ten dam lam an pan chho a, Sassuolo lakah an inlan dawn leh dawn loh a chiang lo a, February 15-a Juventus an hmachhawn hunah erawh an inlan theih tawh a rinawm.

Calhanoglu leh Barella awm loh hlanin Henrikh Mkhitaryan leh Piotr Zielinski te an rintlak avangin hlauhthawn tur erawh a awm lo. Hetih lai hian hliam vanga December hnua la inlan leh lo Denzel Dumfries erawh a dinhmun a chiang lo a, Dumfries hi a ke rek vei lamah tinain a lo kir hun tur sawi chian theih a ni lo.