Hoffenheim laka thawhchhuah tum Bayern Munich

Bundesliga table hmahruaitu Bayern Munich chuan Pathianni zan dar 10 hian Hoffenheim an mikhual dawn a, Bayern hi an match hnuhnung pahnihah an chak zawh loh avangin Hoffenheim lakah chak an tum dawn. Hoffenheim hi table-ah pathumna niin tun season-ah an che ṭha hle a, Bayern hneh an tum dawn avangin inkhel hmuhnawm a beisei ngam.

Bayern hian season bul an ṭan ṭha a, fal takin hma an hruai hman. Mahse 2026-ah beisei an phak lo - Augsburg an hneh loh hnuah Hamburger SV an inhnehtawkpui leh a, anmahni hnaih bertu Borussia Dortmund-in an phak lohna chu point ruk chauh a ni tawh. An mikhual tur Hoffenheim-in an phak lohna pawh point kua chauh a ni.

Si ban nghak turin veteran keeper Manuel Neuer a awm dawn a, Neuer-a hmaah Dayot Upamecano leh Jonathan Tah an inkawp leh a rinawm. Anni bakah hian Asian defender Kim Min-Jae leh Hiroki Ito te an dam ṭha a, midfield-ah Joshua Kimmich-a'n a ho thei dawn bawk.

Bavarians tan tlarhma lamah Harry Kane chu khawih chet thiang lo a ni a, English forward Kane hian Bundesliga-ah ringawt goal 22 a khung tawh a, club tan a chet ṭhat avangin Bayern-in thlun ngheh tumin contract thar an zawrh mek.

Kane thlawp turin Michael Olise, Luis Diaz, Serge Gnabry leh rawlthar duhawm Lennart Karlte an awm leh dawn a, khawvela forward hlauhawm berte zinga mi an ni. Anni bakah hian Jamal Musiala a dam leh tawh a, ni 200 dawn inhliam vanga a inlan loh hnuah Musiala hian a dam tawh tih lantirin goal a khung leh tawh a, an ṭhat dan berin Bayern an inlan thei dawn.

Hoffenheim-in Andreij Kramaric an nei ve tho a, Croatian forward hian league-ah goal riat a khung tawh. Kramaric thlawp turin goal ruk khung tawh Grischa Prömel, Fisnik Asllani leh Tim Lemperle an awm bawk a, khualmuala Bayern hneh thei turin theihna sang tak an nei.