D League-ah Chaltlang BC an champion

Mizoram Basketball Association (MBBA) buatsaih D League-ah Chaltlang BC-in inelna an thunun a, final-ah Vanguard 100-62 a sawpin an champion. Chatlang BC enkawltu hi Vanlalnunsanga (Lana) a ni a, Khatla TBL vanglaia an captain a ni.

Lana hian coach a nih hnuah MBBA recognise tournament bakah inter school leh college inelna tiam vekin nomawi 28 a chawi tawh a, Chaltlang BC hi MSL-a team panga a kaipuina chiah a ni. Chaltlang hma hian BC Bethlehem, Nursery SC, Saron BC leh Mission Veng Hotshot te a kaipui tawh bawk.

Final hi Hawla Indoor Stadium-ah Ningani zan khan khelh a ni a, quarter hmasa ber aṭangin Chaltlang an chungnung. Quarter tawp hmain Samson Lalawmpuia'n 3-point a lut a, 27-11 in quarter hmasa ber a tawp.

Second quarter-ah pawh Chaltlang an che ṭha chhunzawm a, VL Chungnunglura bakah state pawn player Naveen Mishra leh Nigerian Ifenne Ada-Ewa te an chet ṭhat avangin halftime-ah 63-32 a ni der tawh. Vanguard lamin Ramzauva hoin third quarter-ah theihtawp rawn chhuah mah se quarter tawp ber a nih hmain 78-41 a ni tawh.

Quarter tawp ber khelh hmain team pahnih hi point 37-in an inthlau tawh a, chak tur a chiang tawh. Chatlangin point 100 an thleng chho a, point 62 bak Vanguard-in an score thei lo. Champion phu Vanguard-in nomawi an chawi a, club pahnihin season tharah Mizoram Super League an khel ang.

D League-ah hian team pariat an awm a, vawi khat ṭheuh an inkhelh chhuah hnuah a sang pali Chaltlang BC, Vanguard BC, OPD Venghlui leh Chawnpui BC ten knockout stage an lut. EBBC, Nursery SC, Champhai Boars leh Champhai Vengthlang te erawh a hnuai lamah an awm a, Champhai club pahnihte hi an relegate.

D League rual hian hmeichhe inelna kalpui a ni bawk a, team pathum LB Associates, Hotshots leh Team Alpha te an tel a, vawi khat ṭheuh an inkhelh kual hnuah LB Associates leh Mission Veng Hotshots ten final an lut. Mipa inelna hmain final hi khelh a ni a, Hotshots hian 52-48 a hnehin an champion.