Grand Finale-ah Shaun-a'n podium a lawn

India rama bike intlansiak hmanga inelna MRF MoGrip National Supercross Championship 2025 season kharna chu February 7, Inrinni khan Vishakapatnam-ah neih a ni a, College Veng tlangval Shaun Lalremruata Chhangte chu pathumna a ni.

Shaun hian season liam ta khan mahni sum sengin inelna hi a lo hmachhawn tawh a, bike intlansiaka Mizo hming tiṭhatu a ni. Grande finale leh round 6-ah Shaun hi private expert class-ah pathumna a ni a, a bike a chhiat avangin class dang inelnaah erawh a tlan chhunzawm thei ta lo.

College Veng tlangval hi hetiang inelnaa Mizo zinga tel hmasa ber leh tel awmchhun a ni a, nikum khan nomawi pali a hawn. Tun season-ah Raipur, Chhattisgarh (Round 4) leh Goa (Round 5) inelna neih ṭumin private expert class-ah lawmman a la ve ve a, season kharnaah la lehin nomawi pathum a la.

Shaun chuan, "Tun inelnaa result ṭha ka neih theih chhan hi Pathian vang chauh a ni a, min lo ṭawngṭaipuitu zawng zawngte chungah ka lawm hle a ni," tiin a sawi. Private Expert Class-ah Shaun hi National Supercross Championship ranking-ah pahnihna a ni mek.