Mizo pahnih telna Services an champion

79th National Football Championship for Santosh Trophy 2025-26 final chu Services chuan extra time-a Abhishek Pawar goal hmangin Kerala 1-0 in an hneh a, a vawi riat nan Services an champion.

Santosh Trophy champion team-ah hian Mizo tlangval pahnih Ramhlun Vengthar tlangval H. Lalhmingchhuanga leh Ramhlun South tlangval Samuel K. Vanlalpeka te an tel a, final-ah pawh bul ṭan ve vein champion-na kawngah player pawimawh an ni.

Dhakuakhana Football Stadium, Assam-a final khelhah hun pangngaiah goal a lut lo a, extra time-ah Services an vannei ta zawk. Semifinal-a Railways laka goal hnih khungtu Abhishek Pawar-a'n goal awmchhun hi minute 109-naah a khung.

Kerala erawh an vanduai a, kum 2022-a an champion hnuah kum zawnin final lut mah se an chak lo ve ve. Services erawh kum 2012 aṭang khan final vawi ruk lutin nomawi inchuhnaah hnehna an chang vek.