Barca-in hmahruai chhunzawm zel

Barcelona-in Inrinni zan khan Mallorca 3-0 in an hneh a, La Liga table chung berah dinhmun an sawhnghet. Barca tan Robert Lewandowski, Lamine Yamal leh Marc Bernal ten goal khat ṭheuh an khung a, Mallorca-in chhanletna tur an nei lo.

Camp Nou-a inkhelah mualneitu an chungnung tluan zak a, an hmelma Real Madrid-in an chetsual hun an chang reng tih an hria a, an tlawm duh lo. Barca hian vawi 15 lai shot an nei a, an vanneih zan ni se goal tam zawk khung thei tur an ni.

Catalan club hian Spanish Super Cup-ah an hmelma Real hnehin an champion tawh a, inelna dang pathumah an la champion theih vek bawk avangin quadruple champion an ni thei a, Hansi Flick-a nauten an bawhpelh phal lo ang.

Mallorca an hneh avangin Barca hian point liin Real Madrid nen an inthlauhna an tizau a, pakhatnaah an awm chhunzawm zel. Real hian nizan khan Valencia an tlawh a, an chak chuan Barca nen an inthlauhna point khatin an tizim leh ang.