2nd Division champion Ramthar Veng Gladiators

Khaled Memorial 2nd Division Screening Tournament 2025-2026 final chu February 7, Inrinni khan Sihhmui Cricket Ground-ah khelh a ni a, Ramthar Veng Gladiators CC chuan Armed Veng CC chu wicket ruka hnehin an champion. Finalist pahnih Ramthar Veng leh Armed Veng te hian season tharah First Division an khel ang.

Ramthar Veng hi ṭhumvawrah an vannei a, vawm hmasak an thlang. Armed Veng CC tan opener H. Laldintluanga'n thi loin run 66 a siam a, ani bakah Santosh Murmu (25) leh Govind Sarki (23) te chauh run siam tam deuh an awm. Armed Veng CC hi over 46.4-ah an thi fai vek a, 165 runs chauh an siam. Ramthar tan Zoremsanga, Denis Lalremruata, C. Laldinpuia leh R. Lalnuntluanga te'n wicket hnih ṭheuh an la.

Ramthar Veng Gladiators bat hun a thleng a, F. Lalnunkima'n thi loin half century (59) a siam a, C. Laldinpuia'n run 31 a siam bakah Benjamin Lallawmawma'n run 22 siam bawkin over 37.3 chhungin wicket li chauh hlohlin target an umpha der. Armed Veng CC tan Andrew Vanlalhruaia leh Zosangkima te'n wicket hnih ve ve an la mah se result an ti danglam pha lo. Gladiators tana 31 runs baka wicket hnih latu C. Laldinpuia chu man of the match-a thlan a ni.