Napoli chakpuitu Hojlund

Inrinni zan Serie A inkhelah Napoli chuan 3-2 in Genoa an hneh a, goal an chhuah hmasak hnuah Napoli-in huaisen takin hnehna an chang thei hram. Genoa tan Ruslan Malinovskyi leh Lorenzo Colombo ten pet goal a, Napoli-in Rasmus Hojlund-a goal hnih leh Scott McTominay goal hmangin an lehthal.

Luigi Ferraris, Genoa-a inkhelah mualneitu-in minute thumna lekah Malinovsky penalty hmangin hma an hruai a, minute 20-naah Hojlund-a'n pet goal-in an si phurh a sut. Minute hnih hnu lawkah McTominay-a'n Napoli hmahruaina goal a khung chhunzawm a, Manchester United player hlui pahnih an khel ṭha hle.

Second half minute 57-naah Genoa tan Colombo-a'n an siphurh a sut a, Napoli an talbuai chhunzawm - minute 76-naah defender Juan Jesus-a'n yellow card pahnihna hmuin hnawhchhuah a ni a, Genoa an chak mai a rinawm hman.

Goal a luh chhunzawm lawk lo a, an inhnehtawk dawna a lan hnuah Napoli midfielder Antonio Vergara an tihtluk avangin penalty an hlawhchhuak. Napoli tan Hojlund-a'n tun season league bika a goal riatna leh an chakna goal ni turin a khung a, mualneitu team tan sutna hman a awm tawh loh avangin Napoli an chak.

Antonio Conte naute hian point 49 hmuin table-ah pathumna a nih chhunzawm a, an chung chiaha awm AC Milan chu point khat chaihin an pha lo a, Napoli hian match khatin an khel tam zawk thung.