Lebron James a la tar lo

NBA regular season khelh mekah nimin zing khan Los Angeles Lakers-in 105-99 in Golden State Warriors an hneh a, veteran player LeBron James a langsar a, Luka Doncic awm lo mah se harsatna an tawk lo.

Crypto.com Arena-a inkhelah Lakers tan James-a'n a point a ngah ber a, kum 41 mi James hi a kum tam ve deuh tawh mah se court chhungah a la ṭangkai a, player naupang zawk aiin a la langsar thei. James hian point 20, assist 10 leh rebound vawi sarih a la a, triple double a siam teuh hle. A inhliam hnua lo kir Austin Reaves (16), Rui Hachimura (20), leh Marcus Smart (15) ten James an thlawp ṭha bawk.

Warriors tan Moses Moody (25), Gui Santos (15) Pat Spencer leh Brandin Podziemksi (14) te khel ṭha viau mah se Lakers hneh nan a tawk zo lo a, LeBron James leh a naute an ngam lo.

Veteran forward LeBron James hian a career-a regular season bikah point 43,000 a score tling teuh tawh hle a, point 95 chiah mamawh tawhin record a siam ngei a rinawm. NBA la khel zingah amah hnaih bertu Kevin Durant chuan point 32,000 a la score tling lo.

Warriors tan an thiampuipa stephen Curry a inlan lo a, American point guard Curry hian a khupah hliam a tawrh avangin a inlan thei lo. Curry tel lohna Warriors an dang a, chutihrualin inhliam vang thoin Doncic a inlan bik lo a, Warriors tan Curry awm lo hi chhuanlam a tling lo.