Half Marathon atan ni li chiah a awm tawh

Aizawl International Half Marathon (AIHM) 2026 chu Valentine's Day-ah (February 14) neih a ni leh dawn a, inelna ṭan nan ni li chiah a awm tawh. Inelna hi SYS Department bakah Mizoram Athletics Association, Athletics Federation of India leh Innovations India ten ṭangkawpa an buatsaih a ni.

AIHM 2026 registration hi hemi pual bik website aihm2026.com kaltlangin a tih theih a, inziahluh man hi Rs 799 man niin ram pawn aṭanga rawn tel tur tan US dollar 30 (Rs 2713.81) a ngai thung. February 12-13, 2026 hian Lammualah offline registration leh bib lakna hun hawn a ni dawn. Junior leh senior category te bik hi 'offline registration' chauha tih theih a ni dawn a, registration fee pawh a dang aia tlem hretin Rs. 499 chauh a ni ang.

Nikum April 26 khan a vawi khat nan AIHM hi neih a ni a, India ram hmun hrang hrang aṭangin mi 1500 an tel. Mizoramah rel a luh tawh bakah inbuatsaihna ṭha zawka neih a nih avangin inelna tel tur leh chhim tum hrim hi an tam zawk tura ngaih a ni.

Half Marathon hi intlansiaka inelna ni bawk mah se hriselna atan a ṭha a, hnamdang tan Mizoram tlawhna hun remchang a nih bawk avangin Tourism Event Calendar 2026-ah pawh telh a ni. AIHM tlan ṭanna tur leh tawpna tur hi RG Stadium a ni ang.