US-in Pakistan an vel nawn thei ang em?

T20 Cricket World Cup-ah zanin dar 7:00 hian Pakistan leh United States te Sri Lanka khawpui Colombo-ah an inkhel dawn. Shaheens hi group A-ah India, Netherlands, United States leh Namibia te nen an awm ho a, group khat aṭangin pahnih chauhin Super 8 an luh dawn avangin zanin inkhel hi a pawimawh hle.

United States hian kum 2024-a inelna an thlen kumin Pakistan hi Super Over hmangin an hneh a, Shaheens-in Super 8 an luh phak loh laiin US-in group stage an paltlang. US hi vanneih vanga chak an ni thei a, chutihrualin an match hnuhnung berah India nen an inkhelh tawk avangin Pakistan tan zuam a rem lo.

US-ah hian India rama cricket thiamna tat hriam tawh an awm nual a, Indian thisen kai vangin tun inelnaah 'dark horse' ni thei dinhmunah an ding. Captain Monank Patel hi Gujarat-a piang a ni a, Gujarat tana kum bithliah inelnaa inlan tawh a ni.

Tun ṭuma an innghahna Shubham Ranjane pawh Mumbai leh Rajasthan Royals player hlui a ni a, bowling lamah India U19 aiawh pawha khel tawh Saurabh Netravalkar thlengin an awm. Pakistan erawh khelmual pawn lam boruakin team chhungah nghawng a nei a, match hmasa berah Netherlands wicket thumin an hneh hram. US laka phuba la turin Shaheens an fimkhur a ṭul dawn.