Howe nge dinhmun ṭha lo Frank?

Zanin dar 1:00 hian Tottenham Hotspur leh Newcastle United te an inkhel dawn a, league lama an chet ṭhat loh avangin tun season Champions League khel pha pahnih manager Eddie Howe leh Thomas Frank te dinhmun a ṭha lo.

Tottenham hian match 25 aṭangin point 29 an hmu a, 14-naah an awm. Magpies hian point 33 an hmu a, Spurs aiin che ṭha hret mah se 12-naah an awm mek. Frank hi ban theih dinhmunah a ding a, chutihrualin Magpies an chak lo a nih erawh chuan Howe hma lam hun a ṭha bik lo.

Spurs-in hrem vangin captain Cristian Romero an chhawr thei dawn lo. Argentine defender bakah hian hliam vangin James Maddison, Rodrigo Bentancur, Mohammed Kudus, Ben Davies, Lucas Bergvall, Richarlison, Pedro Porro, Destiny Udogie, Dejan Kulusevski leh Kevin Danso te an khel thei dawn lo.

Inhliam vangin Tottenham an buai a, Premier League-ah kuminah chak an la nei lo. Kum 2026-ah Spurs hian match sarih khel tawhin point li chiah an la hmu a, Frank hi an ban a nih pawhin thilmak a ni lo ang.

Newcastle pawhin kartawp khan Brentford 3-2 in hneh lo a, Magpies hi a zawnin match thum an chak lo. Howe tana beiseina erawh Spurs manager Thomas Frank lakah record a nei ṭha a, chutihrualin nikum December thlatira an inkhelh ṭumah erawh 2-2 in an inhnehtawk.

Howe chuan, "Pressure hi chu ka nei reng a, mah se ban hlauhthawnna erawh ka nei lo. Ka theihna sang tak ka lantir theih nan keimah leh keimah hi pressure nasa zawk ka inpe ṭhin. Tun dinhmunah erawh ka hna ka thawk ṭha tawk lo a ni," tiin Bees an hneh loh zawhah a sawi a, Spurs lakah chak ngei a duh ang.

Newcastle hi inelna hrang hrang match hnuhnung pariatah vawi khat chiah an chak a, Tottenham Hotspur Stadium lakah fiahna hautak an hmachhawn dawn.