Mikhual tlangnel Inter

Pathianni zan Serie-a inkhelah Inter Milan chuan an mikhualna ramah hnehna an chang a, 5-0 in Sassuolo an sawp a, table-ah pakhatnaah awm zelin dang theitu an la awm lo. Inter tan Yann Aurel Bisseck, Marcus Thuram, Lautaro Martinez, Manuel Akanji leh Luis Henrique ten goal khat ṭheuh an khung.

Mapei Stadium, Reggio Emilia-a inkhel mikhual team Inter an ngampa a, inkhel an thunun tluan zak. Minute 11-na lekah Bisseck-a'n hmahruaina goal a tauh lut a, Inter an hawi kir tawh lo. Minute 28-naah Thuram-a'n an hmahruaina a belhchhah vein Inter an nung hle.

Minute 50-naah Lautaro Martinez-a'n tun season Serie A-a a goal 14-na a khung a, minute thum hnun lawkah Akanji-a'n an goal lina a tauh lut leh nghal a, goal an chhuah danah Man United midfielder hlui Nemanja Matic-a'n referee bulah a complaint nasat avangin yellow card pahnihna a chawi a, hnawhchhuah a ni.

Goal li chhuah tawh Sassuolo tan thawhchhuah ngaihna a awm tawh lo. Minute 89 naah Luis Henrique-a'n an goal ngana a khung a, nuamsa takin Inter-in khualmualah hnehna an chang.

Cristian Chivu naute hian hma an hruai chhunzawm zel a, an hmelma AC Milan aia match khata khel tam zawk chungin point riatin an sang zawk a, match khelh tur la tam mah se champion beiseina an nei sang hle.

Hetihlai hian Juventus chuan an mikhual Lazio chu 2-2 in an inhnehtawkpui a, Lazio tan Pedro leh Gustav Isaksen ten goal an khung a, Turin club tan Weston McKennie leh Pierre Kalulu ten an si phurh an sut hram a, point khat an insem. Juve hian point 46 hmuin palinaah an awm.