Sri Lanka leh Scotland an chak

T20 Cricket World Cup-ah inelna thlengtu Sri Lanka chuan Pathianni zan khan Ireland chu 20 runs-in an hneh a, nimin khan Scotland-in Italy 73 runs-in an hneh ve bawk.

Colombo-a inkhelah Ireland-in vawm hmasak an thlang. Sri Lanka tan Kusal Mendis-a'n thi loin 56 runs a siam a, top order lam che ṭha tawk lo mah se Kamindu Mendis-a'n 44 runs a rawn belh. Lions hian 163/6 runs chauh an siam.

Irealand tan Ross Adair (34) leh Harry Tector (40) te an che ṭha a, chak beiseina an nei hman. Mahse, team ṭha zawk Sri Lanka tan Maheesh Theekshana (23/3) leh Wahindu Hasaranga (25/3) te an che ṭha a, over 19.5-ah Ireland-in 143 runs chauh siamin an thi fai vek.

Cricket World Cup-ah Europe ram pahnih Scotland leh Italy an inkhel a, tawnhriat nei ṭha zawk Scotland an chak chiang hle. Eden Gardens-a inkhelah hian Scotland-in 207/4 zet an siam a, over lina lekah Italy captain Wayne Madsen a inhliam a, a khel chhunzawm thei lo. Catptain Madsen tel loin Italy-in over 16.4-ah 134 runs chauh an siam thei a, Scottish Saltires 73 runs-in an chak.