Bayern chakna Diaz leh Kane

German champion Bayern Munich chuan 5-1 in Hoffenheim an hneh a, Luis Diaz-a'n hattrick siamin Harry Kane-a'n goal hnih a khung bawk. Hoffenheim tan Andrej Kramaric-a goal khung chu scoreline timawitu chauh a ni.

Allianz Arena-a inkhelah Hoffenheim defender Kevin Akpoguma-a che sual a, minute 17-na lekah Luis Diaz a tihtluk avangin penalty bakah red card a chawi a, Harry Kane-a'n hmahruaina goal a khung.

Minute 35-naah Hoffenheim tan Andrej Kramaric-a'n Bayern keeper Manuel Neuer-a tihsual vangin an si phurh a sut a, Hoffenheim an phur thar a, mahse Kramaric-a goal hi beiseina thlawn siamtu mai a ni.

Minute 45-naah Diaz bawkin penalty a hlawhchhuak a, a pettu ngai Kane-a'n a petna ngaiah bawk a pet a, a team hma a hruai nawnpui. Minute hnih hnu lawkah Diaz-a'n cool takin a pet goal zui bawk a, Hoffenheim keeper Oliver Baumann-a'n a en liam.

Second half chu Diaz-a show a ni a, Colombian forward hian minute 62-na leh 89-naah goal khung belhin hattrick a siam a, Bayern chakpuitu Diaz a khel nung hle. Tun season Bundesliga-ah Diaz hian goal 13 a khung tling chiah a, a teammate Harry Kane chiah a tluk lo. English forward Kane hian goal 24 a khung tling ve chiah bawk.

Bayern hian point 54 hmuin pakhatna an nih chhunzawm zel a, match hnuhnung pahnihah chak zo lo mah se Vincent Kompany naute an insiamṭha leh tawh a, anmahni hnaih bertu Borussia Dortmund aiin point rukin an sang.