Aizawl FC-in MPL final an thleng

Mizoram Premier League champion lai Aizawl FC tan I League vangin final kalkawng hautak mah se Standly Rosario kaihhruainain final an thleng. MPL8 final hi December 14, Inrinni zan dar 7:30 hian RG Stadium-ah Aizawl FC leh Electric Veng FC ten an khel ang.

Nilaini zan khan I League club hian Chanmari FC nen semifinal second leg an khel a, 1-1 in an inhnehtawk. Aizawl FC hi first leg-ah 1-0 a an chak tawh avangin aggregate-ah 2-1 in an chak.

Aizawl FC-in Mohun Bagan an hmachhawn zawhah ni hnih chauh chawlin first leg an khel a, Standly-a'n nomawi an duh avangin an ṭhat dan berin a player-te a chhawr. Chanmari lakah AFC-in inkhel an thunun thei lo a, chutihrualin Isak Vanlalruatfela goal hmangin 1-0 in an chak tho. Hemi hnu hian I League club hi Imphal-ah Neroca lakah 1-0 in an chak lo a, Goa-ah Indian Arrows hneh lehin Chanmari nen an inkhelh hma hian training ṭha an nei hman lo.

Aizawl FC hian Goa aṭanga Aizawl an rawn thlen tukah second leg hi an khelh nghal a ṭul a, an zin kawng hautak zet avangin league round-a pakhatna hi final thleng thei lo dinhmunah an ding.

Rinlawk angin Standly-a'n Aizawl FC ṭhat dan berin a rem a, Chanmari FC tan MS Dawngliana'n bul a ṭan ta bawk. CFC manager Lalhmangaiha Sailo-in goal a luh tur thu a sawi lawk a, an inkhelh dan hmang enin a thleng dik dawn tih a hriat theih nghal.

Aizawl FC forward Rochharzela'n a hun ṭha neih hmasak chu goal-ah petin Chanmari defender-in dansak mah se a per chu chang fuh lehin a aia ṭhain goal kilah tak a pet lut a, I League club dinhmun a 

ṭhat phah hle. Goal luh hnuah Chanmari FC-in beiseina an nei chhunzawm a, na takin Aizawl FC-in nawr letin Dawngtea ke hmui zan a nih loh avangin keeper Lalremruata a hming ṭhat phah. Minute 15-naah Chanmari forward David Laltlansanga'n box pawn chiah aṭangin a pet goal a, keeper Arema a che rang tawk lo.

Aizawl FC player-te an chau tih a lang chho a, Chanmari beiseina sang chho mah se halftime-ah 1-1 a ni. Minute 45 khelh hmabakah dinhmun ṭha zawk hriatthiam a la har tho.

Aizawl FC-in coach Standly hnuaiah nasa takin hma an sawn tih a lang a, minute 45 khelh hmabakah inkhel thunun tur zawka ngaih Chanmari aiin I League club an che ṭha zawk. AFC rawlthar Chhara leh Isak Vanlalruatfela te an zin chau nachungin an tih tur chin an ti thlap thlap a, midfield-ah man of the match-a thlan Alfred Kemah Jayran a awm bawk avangin inkhel an thunun zawk.

Chanmari FC aiin Aizawl FC-in goal khung belhna hun an nei ṭha zawk. Standly Rosario chuan, "Thla li chhung rim taka kan hnahthawh rah chu a lang chho mek. Zep tur a awm lo a, ka naute an chau. Amaherawhchu khelmualah nomawi kan duh tih a lang a, an theihna zawng zawngin training-a kan zir angte tih hlawhtlin an tum avangin an chungah ka lawm takzet a ni," tiin Vanglaini a hrilh.

Aizawl FC hi MPL3 leh MPL4-ah khan kum zawnin an champion tawha, MPL7-ah a lungthu kim nan champion-in kuminah kum zawna champion theihna hun ṭha an nei leh chiah a ni.