Dembele hoin PSG-in Marseille sawp

Pathianni zan khan Paris Saint Germain chuan an mikhual Marseille chu 5-0 in an sawp a, Ousmane Dembele-a'n goal hnih a khung bakah Khvicha Kvaratskhelia leh Lee Kang-In ten goal khat ve ve an khung a, Marseille defender Facundo Medina-a'n an lamah a tilut bawk.

Parc des Princes-a inkhelah PSG-in inkhel an thunun zawk a, Dembele-a'n a thiam thil lantirin first half-ah goal hnih a khung a, Ballon d Or kawl mektu Dembele hi tun season-ah hliamin tlakbuakin beisei pha lo mah se a thiam ngaiin a la thiam reng tih a lantir a, first half-ah a team hma a hruaipui.

Second half-ah PSG-in inkhel an thunun chhunzawm a, minute 64-naah Marseille defender Facundo Medina-a'n an lamah a tauh lut palh a, minute hnih hnu lawkah Kvaratskhelia-a'n chiang takin a pet goal zui.

Minute 74-naah South-Korean midfielder Lee Kang In-a'n team goal ngana leh an chak nemnghehna goal a khung a, Marseille tan Mason Greenwood leh Pierre Emerick Aubameyang te an che hleithei lo a, goal an khung ve theih loh avangin nuamsa takin PSG an chak.

PSG coach Luis Enrique-a'n,"Ka hmuh hmasak ber aṭang khan player danglam bik a ni tih ka hria. Hliam in a tlabuak reng avangin a tan ngai awh leh a harsa dawn," tiin Ousmane Dembele chungchang a sawi.

An chak leh tak avangin PSG-in table chung ber an luah chhunzawm a, point 51 hmuin anmahnin hnaih bertu RC Lens-in point hnihin an pha lo.