Timberwolves ngam loh Leonard

NBA regular season khelh mekah nimin zing khan Los Angeles Clippers chuan 115-96 in Minnesota Timberwolves an hneh a, Kawhi Leonard-a langsar a, Wolves player-ten an ngam meuh lo

Target Center, Minneapolis-a inkhelah American forward Leonard-a'n point 41 neiin a score sang ber a, rebound pariat leh steal pali a nei bawkin a langsar fal nalh. John Collins (15), Yanic Konan Niederhauser (15) leh Kobe Sanders (10) Kawhi an thlawp ṭha bawk a, Clippers chak nan an thawhhlawk hle.

Wolves tan Anthony Edwards-a'n point 23 neiin a team tan a score hnem ber a, Julius Randle (17), Ayo Dosunmu (11) leh Rudy Gobert (10) te khel chhe lo mah se an vanduai ṭum an tawng a, Wolves chak nan a tawk zo lo.

Clippers tan James Harden nena an trade Darius Garland a la inlan thei lo a, Garland hian a ke dinglamah hliam a nei a, a lo kir hun tur chiang lo mah se naktuk zinga Houston Rockets nen an inkhelh hunah a inlan theih a beiseiawm loh.