Salah thutluknaah Egypt innghat

Egypt coach Shawky Gharib chuan Olympic 2020-a mipa football hmachhawn tur zingah Mohamed Salah hming a telh a, mahse hei erawh puan chhinna chauh niin player 50 hmingdah a ni. 

Tokyo-a neih tur Olympic football hi August 8-ah khelh ṭan tur a ni a, hemi ni hi Premier League 2020-21 season atana match hmasa ber khelh hun tur a nih avangin Salah hming lo lang hian sawi a hlawh hle.

Mahse Egypt boss chuan, "Salah hi lo tel ngei ngei turin kan nawr thei lo a, amah mai bakah Liverpool leh coach Jurgen Klopp-te thutlukna pawh a ni tel ang. Tunah chuan player 50 chauh kan thlang a, June-ah player 18 hming kan theh lut ang," a ti. 

Olympic football hi kum 23 hnuai lam footballer te inelna a ni a, mahse kum 23 chunglam player pathum an tel phal a ni thung. 

Hetihlai hian Liverpool boss Klopp chuan, "Eng thutlukna mah kan la siam lo. Kan siam ta a nih pawhin press conference-ah puangzar loin Salah ka hrilh mai ang," tiin a lo sawi tawh.