India-in West Indies an sawp

India chuan T20-ah West Indies laka 2-1 a series la turin Nilaini zan khan run 67-in hnehna an chang. Men in Blue tan captain Virat Kohli bakah KL Rahul leh Rohit Sharma te an che ṭha a, run 240/3 zet an siam chu mikhual Windies tan umphak rual ni loin 173/8 bak an tlin lo.

Wankhede Stadium-a inkhelah hian coin toss-ah West Indies an vannei a, an chak ṭum ang thoin vawm hmasak an thlang. Tun ṭumah erawh India opener-te'n inkhel entute an tibeidawng lo. Rohit Sharma leh KL Rahul ten Windies bowler-te an nghaisa a ni ber a, Rohit hian ball 34 lekah run 71 a vaw chhuak. KL Rahul pawhin ball 56 lekah run 91 a siam a, Rishabh Pant-a'n run siam loin ball hnihnaah thi mah se Kohli tan hun tam zawk a peah a ngaih theih.

Captain Kohli hian six vawi sarih zet a rawn vua a, ball 29-ah run 70 a siam. India hian over 20-ah run 240/3 an siam a, chak turin an dinhmun a ṭha takzet. Target sang tak hmachhawn West Indies an talbuai nghal a, opener pahnih Lendl Simmons (7) leh Brandon King (5) ten run 10 an siam tling lo.

Windies tana che ṭha pahnih captain Kieron Pollard leh Shimron Hetmyer ten run 68 leh 41 siam mah se over 20-ah run 173 chauh an tlin a, wicket riat an hloh bawk. India bowler Deepak Chahar, Bhuvneshwar Kumar, Mohammed Shami leh Kuldeep Yadav ten wicket hnih ṭheuh an la. India leh West Indies te hian ODI match thum an khel chhunzawm dawn a, match hmasa ber hi Pathianni tlai dar 1:30 hian M.A. Chidambaram Stadium, Chennai-ah an khel ang.